ବରଗଡ଼: ଇମ୍ପେରିୟଲ କଲେଜରେ ଆୟୋଜିତ ଏକଦିନିଆ “ଏଲିକ୍ସିର ଆଲୋଚନାଚକ୍ର” ମାଧ୍ୟମରେ ଉଚ୍ଚ ଶିକ୍ଷାରେ ସମସ୍ୟା ସମାଧାନ ପାଇଁ ଇଣ୍ଟରଡିସିପ୍ଲିନାରୀ ଶିକ୍ଷାର ଭୂମିକା ଉପରେ ଆଲୋଚନା କରାଯାଇଥିଲା। ଏହି ଅବସରରେ ବିଭିନ୍ନ ଶିକ୍ଷାନୁଷ୍ଠାନର ବିଶିଷ୍ଟ ଶିକ୍ଷାବିଦ୍ ତଥା ଅଧ୍ୟାପକଗଣ ଉପସ୍ଥିତ ଥିଲେ ଏବଂ ସେମାନେ ଇଣ୍ଟରଡିସିପ୍ଲିନାରୀ ଶିକ୍ଷା ପାଇଁ ତାଙ୍କର ସୁଚିନ୍ତିତ ମତାମତ ପ୍ରକାଶ କରିଥିଲେ। ସେମାନଙ୍କ ମତରେ, ଏହି ଆଧୁନିକ ଆଦର୍ଶ ଶିକ୍ଷା ପଦ୍ଧତି ଛାତ୍ରଛାତ୍ରୀମାନଙ୍କୁ ବିଭିନ୍ନ ଦୃଷ୍ଟିକୋଣରୁ ଚିନ୍ତା କରିବାର କ୍ଷମତା ଓ ନୂତନ ଜ୍ଞାନ ସଂପାଦନ କରିବାରେ ବିଶେଷ ସହାୟକ ହୋଇପାରିବ।
ଦ୍ୱିତୀୟ ଅଧିବେଶନରେ ଇମ୍ପେରିୟଲ କଲେଜର ଅଧ୍ୟକ୍ଷ ଡ଼ା. ଦୁର୍ଗେଶ ଶତପଥୀ, ଅଧ୍ୟାପକ ରାକେଶ ମିଶ୍ର, ଅଧ୍ୟାପିକା ସ୍ୱାତି ରଣା ଏବଂ ଶ୍ରୀ ନରେନ୍ଦ୍ର ପ୍ରଧାନ ନିଜର ନୀତିବିଷୟକ ସଂକଳ୍ପ ଓ ଇଣ୍ଟରଡିସିପ୍ଲିନାରୀ ଶିକ୍ଷାର ଭୂମିକା ଉପରେ ଚର୍ଚ୍ଚା କରିଥିଲେ। କଲେଜର ଛାତ୍ରଛାତ୍ରୀମାନେ ମଧ୍ୟ ଏ ସଂକ୍ରାନ୍ତରେ ନିଜର ସଂକ୍ଷିପ୍ତ ଚିନ୍ତାଧାରା ଉପସ୍ଥାପନ କରି ତାଙ୍କର ଜ୍ଞାନ ଓ ଉତ୍ସାହ ପ୍ରଦର୍ଶନ କରିଥିଲେ। ତୃତୀୟ ପ୍ୟାନେଲରେ ଛାତ୍ରୀ ଲାବନ୍ୟ ପଣ୍ଡା, ସଞ୍ଚିତା ତ୍ରିପାଠୀ, ଜାସମିନ ଭୋଇ ଏବଂ ଅକଂଶ୍ୟା ବେହେରା ଇଣ୍ଟରଡିସିପ୍ଲିନାରୀ ଶିକ୍ଷାର ଆବଶ୍ୟକତା ବିଷୟରେ ଆଲୋଚନା କରିଥିଲେ ଏବଂ ଏହାକୁ ନୂତନ ଶିକ୍ଷା ନୀତି ରୂପେ କିପରି ଗୃହୀତ କରାଯାଇପାରିବ ତାଉପରେ ନିଜର ଚିନ୍ତାଧାରା ଉପସ୍ଥାପନ କରିଥିଲେ।